Herr Heidhart “Der viel lieben sumerzît" Der vil lieben sumerzît manec herze wunneclîche erlachet swer den winter her in senden sorgen was der sol nû an hôhen vröuden rîchen schouwet wie diu heide lît meie wunneclîchiu kleider machet liehte bluomen dringent durch daz grüene gras nahtegal ir hügen lât dar strîchen schouwet an den grüenen walt der hât sich mit loube schôn bedecket rîche blüete manecvalt vrühtec saft ûz grüenem zwîge erwecket swie der winter truoc dem sumer grôzen nît der hât in gewalteclîche erschrecket Alsô hât ein sælic wîp mîner guoten sinne mich beroubet daz ich niht enweiz wie ich gebâren sol si hât mich der minne gar gevangen daz sie spræche: “vrô belîp! vriuntlîch dienst sî dir von mir erloubet" daz tæt mînem herzen inneclîchen wol nâch ir grüezen muoz mich sêre belangen minne, bis mîn helfærinn daz si wîbes güete gein mir bedenke nim mîn herze und vüere irz hin daz sie schouwe wie si mich bekrenke minne, herten muot ûz irem herzen trîp daz si mir noch hôhe vröude schenke Wære ich von ir âne leit ich wolt aber von den tumben singen die sint hiure t¦rscher dan ein ander jâr rehter wîse sind si unversunnen swer niht kluoge gürtel treit und ein niuwefürbet kipfelklingen und ein vêchez aremuz ûf sînem hâr der hât viertel kornes nie gewunnen wære ein metze eins pfundes wert umb ein vliegendach würd er verkrâmet ei, wer hât si daz gelêrt daz ir einer ûf den andern râmet? swer dâ trage die aller zinzelwehsten pfeit der sich an dem reien niht versâmet Ich weiz einen widerdriez den hât Engelmâr und sîn gesellen Engeldîch und Engelvrit und Engelbær und Engelbreht und Engelhart der hiuze Hildebold tregt einen spiez dâ mit will er vil der tôten vellen Eberhart und Eberlîn und Eberger Peter, Jakob die hebent grôz gestriuze zwelve sint ir an der schar noch nenn ich iu mêr der tumben leien Sigeher, Sigehart, Sigemâr Liupol, Eghart lâzent sich niht zweien Rinbreht, Wülwîn, Ruodolf, Vriderîch hânt geniez die siht man gar üppeclichen reien Dietbold, Gunther und Dietmâr Diether, Dietrîch, Otte von der linden Heinrîch, Kuonrât, Uolrich, Berhtolt, Herman Walther, Ratpolt, Hiugel und Ottacker gênt in Engelmâres schar swâ si ebenhiuze gein in vinden ûf ir sehzec wellent si niht sorge hân wan si dünkent sich sô rehte wacker sô hât ouch daz Marhvelt gein in her vil t¦rsche sprenzelære die in leistent guoten gelt und inz wider wegent mit der swære trutz und tratz! und hebt sich dieser keiner dar sîn gesellen h¦rent b¦siu mære Gumpolt, Gumpreht, Gôzwin, Gôz, Gôzbreht, Gundolt, Lanther unde Lanze, Vrizper, Werbel, Wolfgang, Slundolt, Gundewîn, Randolt, Holerswam und Renkendrüzzel der geselleschaft ist grôz Râtolt, Râtwîn gênt mit in ze tanze Trahenger und Eberzant und Brangelîn schiezent mit ir blicken tumbe Schüzzel Reisolt, Biutenwîn, Schluch und Schic, Baldentrit und ouch der meier Gêre, Hanolt, Heinrîch, Ahselblic, Liutfrit, Mangold, noch nenn ich ir mêre: Ilsunc, Simelhart und Eppe gênt nit blôz und ir swert diu snîdent alsô sêre. Sigelôch und eggerîch, Berewîn und Enzeman, der vreche die vertrüegen niht dem keiser einen zorn wan si sint sô rehte übermüete Hangebolt ist ir gelîch swaz der Ungenande nû gespreche das hât Wüetelgôz und Amelrîch gesworn daz sich Engelmâr des niht behüete im wird daz gerehte bein kürzer den daz ander einer spanne wê wie jæmmerlîche er grein dô er sînen vuoz sach tragen danne! Den verschriet im Hildebold und Amelrîch daz will er noch rechen, ichn weiz wanne. Hiure was ein côvenanz dâ ze Loubendorf bî Rackenphîle dar kam ûz der Tulner gebiete ein michel schar zwir sô vil kam ab dem Marhvelde dâ sach ich mangen sporenglanz als er êrste vliuhe her von der vîle ir gelæzes nam ich tougenlîchen war daz ich an den gouchen ofte melde schiere ginc der hoppaldei durch einander mit den blôzen klingen sich huop ein vil grôz geschrei beidenthalben von den getelingen seht, dâ wart verhouwen manec rôsenkranz daz daz bluot hernâch begunde dringen. Wunden sluogens über al sich hup von in hübschez struchgevelle der ê des gesunder an dem reien gienc den vuorte man von dannen mit geleite zwelve was ir an der zal die dâ lâgen - sagt mir mîn geselle - der ieglîcher grôzen schaden dô enpfienc ân die der ich dennoch niht enreite Hûc und Otte wurden wunt Wüetelgôz der was ein teil ze gæhe dem wart einez durch slunt dâ von macht er noch sîn rede sô spæhe von dem schimphe sturben sibene ûf der wal mich enruochte, swenn es noch mê beschæhe. Für die Richtigkeit keine Gewähr C 2/2003 Spielleut.de